కీర్తనలు నారాయణ తీర్థ శ్రీకృష్ణలీలాతరంగిణి
షష్ఠ తరంగం (శ్రీకృష్ణగోపీసమాగమ వర్ణనం)
శ్లో. బృందావనేఽథ శ్రీకృష్ణగోపీసంగోఽభినీయతే
ఆదౌ గోప్యస్తతః కృష్ణో గోపీనాం కృష్ణసంగమః॥		 1
శ్లో. గోపీశ్రీకృష్ణసంవాదస్తతో గోపీపరిగ్రహః
షష్ఠేస్మి\న్‌ సంగ్రహేణైవం రాసారంభో నిగద్యతే॥		 2
శ్లో. శారదేవ శరదాగతా స్వయం తారకోదయవిశేషభాసురా
వారిదేషు సలిలేషు ధీమతాం స్మారితార్థమవభాసయంత్యసౌ॥		 3
గద్య. తత్ర భగవతి శ్రీనివాసే పరిపాలిత నిజదాసే సంతతానంత
కల్యాణ గుణగణ నవరత్న రత్నాకరే సరళమురళీనాద సముదంచిత
వివిధ గీత సముద్ఘోష మందగమనోల్లాస వివిధ విలాస బహు
తర కల్లోల జాలే భువన సుందరే శ్రీకృష్ణే విహరతి తస్మి\న్‌ వ్రజ
యువతీమనోనద్యః స్యందమానాః సమభివ్యక్త శారద విమలీకృత
వృత్తి విశేషానుభవ రసాఢ్యాః తథైకరస్య మభిలషంత్యస్సత్వ
రమా వివిశుః। ఇత్థం చ తాసాం వచో విలాసా ప్రాదుర్బభూవుః॥		 4
కీర్తన
కేదారగౌళ(తోడి) - ఆది
పల్లవి:పరమపురుష మనుయామ వయం సఖి - పరమపురుష మనుయామ॥
అనుపల్లవి:సురుచిరహాసం సుందరనాసం తరుణారుణ కిరణాధర సరసమ్‌॥
చరణ (1):నందకుమారం నగవరధీరం బృందావనభువి వివిధవిహారం
 బృందారకగణవందితచరణారవింద మిళితమణిమధుకరనికరమ్‌॥
చరణ (2):భావుకచరణం భవసంతరణం భవ్యసేవకజనభాగ్యవితరణం
 అవ్యయవిమలవిభూతి విజృంభిత దివ్య మణి రచిత వివిధాభరణమ్‌॥
చరణ (3):పరమోదారం పాపవిదూరం స్మరసాయక స్రగ్ధర మతిచతురం
 విరచిత మురళీ గీత రసామృత భరితఘనంఘన కౌస్తుభహారమ్‌॥
చరణ (4):యువతీగీత నియోగి సులలితం కవిజనమానస కమల విలసితం
 శివనారాయణతీర్థ విరచితం శ్రీగోపాలదయారసమిళితమ్‌॥
 06.01
శ్లో. భోభో వ్రజపురనార్యః శారదసమయం పరం శివం మత్వా
కృపయా తస్య భజామో గోవిందం ప్రాహురితి సదాన్యోన్యమ్‌॥		 5
కీర్తన
కల్యాణి(సారంగ) - త్రిపుట
పల్లవి:శంకే శంకరం శారదసమయం
 పంకేరుహపరాగవిభూతిధవళమ్‌॥
చరణ (1):పాపపంకశోషణపటుతర రవికిరణం
 పరిహృతాపరిమితఘనావరణం
 కపట కేతకకుసుమభారవిరహిణం
 కలితతారకగణస్ఫటికాక్షాభరణమ్‌॥
చరణ (2):పరపురుషసురతిపతికామవిదూరం
 పండితమండలపరమాహ్లాదకరం
 వరహంసగతివిఘ్న పాటనచతురం
 వాంఛితసముదిత ఫలవిధాతారమ్‌॥
చరణ (3):నిర్మల రసపూర నిరుపమ గంగం
 నిఖిలమానినీజన మానవిభంగం
 శర్మద శశిధర సరసోత్తమాంగం
 సముదితగోవింద కృత బహుసంగమ్‌॥
చరణ (4):ఇతి గోపవధూగీత మిద మతిలలితం
 ఈశోపమశారద సమయ విలసితం
 యతివర శివనారాయణతీర్థ ఫణితం
 యాదవాబ్ధిజరత్న సమ్మిళితమ్‌॥
 06.02
శ్లో. ఇతిప్రలపతి వ్రజే శరది గోపికామండలే
సుధాకిరణమండలే పరిహృదాంధకారే నిశి
పరాక్ప్రవణమానసాస్సఖలు కృష్ణ సారాఃస్ఫుటం
మురారి మురళీ రవస్సపది తాస్సమాకర్షతి॥		 6
శ్లో. కాపి గోపీ పరం కాంతం కామచారఫలోదయం
గంతుకామేతరాం గోపీం త్వరయంతీదమాహ తామ్‌॥		 7
కీర్తన
ముఖారి(పున్నాగవరాళి) - త్రిపుట
పల్లవి:బృందావన మధునా మన్యే సఖి
 బృహదారణ్య మహమ్‌॥
అనుపల్లవి:సుందరతరవంశనాదసంసూచిత స్వా
 నందబోధామృతమయపురుషమ్‌॥
చరణ (1):ఉన్నతశాఖాగ్ర పరానంద
 నిర్ణయరసపూరఫలభారం
 పుణ్యవతా మతిరమణీయ మమరేంద్ర
 వర్ణితభూమపదం భవపారమ్‌॥
చరణ (2):మునివరపరిసేవితం మోహవిరామ
 మూల మశేషవిశేషాస్పదం
 అనికేతనికేతన మఖిలశోకహర
 మనుదయలయపరతరసిద్ధఫలదమ్‌॥
చరణ (3):సకృ దిదమవలోకితం సమ్యగిహ
 స్వసుతకళత్రాది ధనవిరసం
 ప్రకటయతిపరమహంససమాకుల
 మమలమానసవృత్తివిలసితసరసమ్‌॥
చరణ (4):పరిహృతరిపువర్గం పరమయోగి
 పరిపూర్ణభావవిశేషోదయం
 హరిపరభావనయాగోపికాగీత
 మతిఫణితం నారాయణతీర్థయతినా॥
 06.03
గద్య. ఇత్థ మన్యోన్య స్నేహదయారస స్యందన ద్రవీకృతచిత్తవృత్తి విలా
సోల్లాసిత వాగ్విలాసవత్యో గోకుల పురవర యువత్యో గోవింద
బృందావన సముదంచిత విపులతర లక్ష్మీవిలాస లాస్య రంగ
స్థలాయమాన రమ్య వక్షో విశాల ఫాలాదిసుందర సర్వాంగం
స్వకాంత మాలక్ష్య మదన మహీపతి కార్ముక మహామేఘసముద్గళిత
శత వర్షధారా ఇవ నిబిడతర బృందారణ్య నిగూఢం నవనీతముషం
సమాసాద్య సకలలోకాభీష్టఫలం ఫలయంతం విశ్వంభరా
ప్రదేశమివ వర్షధారాశ్శ్రుతయ ఇవ శ్రోత్రియం సమధిగతా
స్సత్వర మాజగ్ముః। నయనోత్పలాని చ తస్మి\న్‌ శ్రీనివాసే
ప్రసారయామాసుః।		 8
కీర్తన
శంకరాభరణము - ఆట
పల్లవి:పల్లవాంగనా మా కలయత ధర్మోల్లంఘనమ్‌॥
అనుపల్లవి:వల్లవాంగనా నిజవల్లభపదయుగ
 పల్లవసేవన మేవ పరో ధర్మో॥
చరణ (1):కులశీలకర్మాదికుళీరాదిజాలం
 కోపసంతాపాదినిబిడకల్లోలం
 అల మిహ సంసారజలధి మాగమకృత
 కులధర్మసేతు రథ తారయతి బహుళమ్‌॥
చరణ (2):రహసి నిశి వనే కిం రమణీయచరణం
 మహనీయగృహపతి మపహాయ తరుణం
 సహసా పరమపురుషానుసరణే నాలమిహ
 గృహపతి మిహ యాత గృహిణీ శరణమ్‌॥
చరణ (3):గురుబంధుజనావజ్ఞా కుత్సితాచారం
 పరిహరత కురుత పరపరిహారం
 త్వరయైవ గృహ మనుయాత పాతకబుద్ధి
 మరివర్గ మపి పరిహరత నిస్సారమ్‌॥
చరణ (4):పరిపూర్ణ బోధైకరసమఖిలసారం
 పరమపురుష మనుసరత బాలగోపాలం
 గురువర కరుణాసుధాసముదంచిత
 శివనారాయణతీర్థయతిగీతమతులమ్‌॥
 06.04
శ్లో. శ్రవణాంజలిభిర్గోప్యో గోవింద వచనామృతం
పీత్వాఽపి జాతిస్వాభావ్యాల్లజ్జాభారభరైః స్థితాః॥		 10
శ్లో. పునః పునర్బోధయంతం ధర్మసారగిరా హరిం
ఊచుర్గోప్యో హరేస్తత్త్వం వ్యంజయంత్యోయథాగమాః॥		 11
కీర్తన
మంగళకాపి - ఆట
పల్లవి:శరణం భవ కృష్ణ సంసరతాం భవ కృష్ణ॥
అనుపల్లవి:కరుణా తవ సంసరణపయోధి సం
 తరణీతి వరమునిఫణితి రస్మాకమ్‌॥
చరణ (1):ఆరంభణ మథ జగతి ఫలావధి
 ధీరమునిభి రిహ నిశ్చితమఖిలం
 భూరికృపాలయ మాహురి హాగమ
 సారం త్వా మఖిలాత్మక మమలమ్‌॥
చరణ (2):సూనం త్రిభువనగృహిణీపతి రితి
 గానం మహతా మనుసంవిదితం
 శ్రీనందాత్మజ శ్రీవసుధాధిపా
 నందం త్వా మనుయాయో నిరతమ్‌॥
చరణ (3):కామినీజనసకలకామదుహం పరమ
 కారుణికం ప్రాహు రేవ భవంతం
 కోమలగిరా గోపికాగణగీతం
 గోవింద మితి నారాయణతీర్థభణితమ్‌॥
 06.05
శ్లో. జన్మాంతర సహస్రేషు కృతపుణ్యఫలోదయా
ఇద మా హాపరా కాంతం కుర్వంతీ ప్రణతీర్ముహుః॥		 12


గానం: శ్రీ ఆకొండి శ్రీనివాస రాజారావు, కాకినాడ.

కీర్తన
బిలహరి(మోహన) - ఆది
పల్లవి:పూరయ మమ కామం గోపాల -
 పూరయ మమ కామమ్‌॥
అనుపల్లవి:వారంవారం వందన మస్తుతే -
 వారిజ దళ నయన గోపాల॥
చరణ (1):మన్యే త్వామిహమాధవదైవం -
 మాయాస్వీకృతమానుషభావం
 ధన్యైరాదృతతత్త్వస్వభావం -
 ధాతారం జగతా మతివిభవమ్‌॥
చరణ (2):బృందావనచర బర్హావతంస -
 బద్ధకుంజవనబహులవిలాస
 సాంద్రానంద సముద్గీర్ణహాస -
 సంగతి కేయూర సముదితదాస॥
చరణ (3):మత్స్యకూర్మాది దశమహితావతార -
 మదనుగ్రహా దవ మదనగోపాల
 వాత్సల్యపాలితవరయోగిబృంద -
 వరనారాయణతీర్థవర్ధితమోద॥
 06.06
శ్లో. నృణాం బంధహతిం కుర్వ\న్‌ నృసింహోఽసి దయాఘన
ఇతి సంబోధ్య గోవింద సానందం ప్రాహ గోపికా॥		 13
కీర్తన
సావేరి - త్రిపుట
పల్లవి:కరుణయాఽవలోకయమాం శ్రీనృసింహ॥
అనుపల్లవి:శూరాసుర సంహార శోభనాద్రి శ్రీనృసింహ॥
చరణ (1):పరిపూర్ణ దయారస పాథోధి బృంహణ
 ప్రహ్లాద చంద్రోదయ శ్రీనృసింహ
 నిరసిత తామస నిర్విశేషమానస
 గురుతరవీర శ్రీ గూఢసుగుణాలయ॥
చరణ (2):పాతకమహాటవీ పంక్తికోపానల
 భక్తచందనశీతల శ్రీనృసింహ
 ఉత్తుంగసుకిరీట ఉన్నతకేయూర
 మత్తచిత్తమాతంగ మర్దనమహాబల॥
చరణ (3):త్రైగుణ్యఫలాతీత తత్త్వఫలాత్మక
 తాపజలధితారక శ్రీనృసింహ
 శ్రీగురుకరుణయా శ్రితభక్తిసుధారస
 శ్రీనారాయణతీర్థ శ్రేయోవిధాయక॥
 06.07
శ్లో. అన్యాపిఽ యువతీ కాచి దన్యాదృశగిరా హరిం
ధన్యా సంబోధయంత్యద్ధా సన్యాయం ప్రాహ సాదరమ్‌॥		 14
కీర్తన
పున్నాగవరాళి - ఆట
పల్లవి:భూయో భూయో యాచేఽంజలినా
 భూమ\న్‌ త్వయి మే దాస్యం దేహి॥
చరణ (1):నిమిషార్ధ మపి తవ దర్శనవిధురా
 నింద్యా హి తనురేషా
 తామరసేక్షణ తవ పాదకమలే
 తనుతాం తనుతాం మమ తనో రతులామ్‌॥
చరణ (2):కాంతం కాంతార మపి తవ యోగే
 కమలేక్షణ మన్యే
 కాంతారం గృహ మపి తు వియోగే
 కరుణా తరుణీ మయి తవ భవతు॥
చరణ (3):వరయామి గోపాలవల్లభమధునా
 త్వరయాఽహ మఖిలగురుం
 సరసగిరా గోపయువతీకథిత మితి
 గురుకృపయా నారాయణతీర్థఫణితమ్‌॥
 06.08
శ్లో. మురారివచనా వ్యగ్రా వల్లవీ కాపి తత్పరా
సంబోధయిత్వా స్వసఖీ మితి గాయతి సాదరమ్‌॥		 15
కీర్తన
కల్యాణి - ఆట
పల్లవి:వద కిం కరవాణి సఖి హే
 వద కోకిలశుకవాణి॥
అనుపల్లవి:బత వనభువి బర్హి బర్హావతంసో
 వదతి కి మపి కి మపి వక్రతయాఽలమ్‌॥
చరణ (1):నిమిషార్ధ మపి యుగసహస్రసమతయా
 నీతం మయా దిన మాసాయం
 అమితకృపానిధిరయమితి సహసా
 అధునాఽఽగత మిహ త్యజతి కథమయమ్‌॥
చరణ (2):గృహపతిపుత్రధనాదిషు మమతా
 గ్రహపరిగృహీతాంతరంగం
 మహనీయమురళీసరళగీతమంత్రేణ
 మోచిత మపి రచయతి గృహసంగమ్‌॥
చరణ (3):తపసా కిల మహతా భువి కల్పక
 తరు ముపలభ్య కోఽపి కామితదం
 సఫలేయ మితి గోపికాగణగీతం
 విపులం శివనారాయణతీర్థే నేదమ్‌॥
 06.09
శ్లో. మధ్యే కృష్ణం మరకతమణిచ్ఛాయ మిచ్ఛావిహారం
కృత్వా గోప్యః కువలయదృశో నాయకం వేష్టయంత్యః
గాయంత్యస్తం సరసవచసా దాస్యభావం భజంతో
బృందారణ్యే మణయ ఇవ తాః పద్మరాగా ఇవాసన్‌॥		 16
శ్లో. నిగమబృంద సరోరుహ సంగతం నిఖిలలోకమధుస్వసుఖాత్మకం
మధురిపుం ప్రతిలభ్యచ వల్లవీ మధుకరాస్సుకరం జగురిత్యలమ్‌॥		 17
కీర్తన
కేదారగౌళ (కాంభోజి) - ఆట
పల్లవి:వనభువిగోపాల విహరంతమ్‌॥
అనుపల్లవి:వల్లవ యువతీ జన వలయ భాస్వంతమ్‌॥
చరణ (1):నిగమసరోరుహనిత్యసంగతమధు
 మధుహరాత్మత యేహ సముదితం
 అగణితగోధన మపరిమితానందం
 ఆనందకర మమరేశితు రపి తమ్‌॥
చరణ (2):ఇనశశిపావకతారకాభాసక
 మీక్షణసముదితజగదేకనాథం
 మునిజనమానససారసవరహంస
 మహనీయదైవత మఖిలదేహరథమ్‌॥
చరణ (3):లావణ్య సరిదేకనాయక మఖిలసం
 రక్షణ మమరసంరక్షణ మధునా
 సేవక శివనారాయణతీర్థభావిత
 శ్రేయోవిధాయక మిహ వేదవిధినా॥
 06.10
శ్లో. గాయంత్యో ననృతుశ్చేత్థం గాయంతం నందనందనం
వేణునాదసుధాధారా ముద్గిరంతం ముహుర్హుహుః॥		 18
ఇతి శ్రీనారాయణతీర్థవిరచితాయాం శ్రీకృష్ణలీలాతరంగిణ్యాం
శ్రీకృష్ణగోపీసమాగమవర్ణనంనామ షష్ఠతరంగః॥
AndhraBharati AMdhra bhArati - nArAyaNa tIrtha - Krishna lila tarangini - Krishna leela tarangini - Krishnalilatarangini - Krishna lila taramgini - nArAyaNa teertha Narayanateertha Narayana teerdha Narayanateerdha andhra telugu tenugu ( telugu andhra )