కీర్తనలు నారాయణ తీర్థ శ్రీకృష్ణలీలాతరంగిణి
సప్తమ తరంగం (శ్రీకృష్ణరాసక్రీడా వర్ణనం)
శ్లో. అథాభినీయతే రాసక్రీడాఖ్యం చరితం హరేః
గోపీకదంబసహిత శ్రీకృష్ణాగమనం వనే॥		 1
శ్లో. తాసాం తత్త్వోపదేశశ్చ తాభిరానందతాండవం
తత్కృతం హరిణా సర్వం పుష్పవృష్టి స్సురైః కృతా॥		 2
శ్లో. లాస్యతాండవసంగీతైః గోపీనాం చిత్తరంజనం
సంగ్రహః కథితస్త్వేవం సప్తమేఽస్మి\న్‌ తరంగకే॥		 3
శ్లో. అనేక జన్మ సాహస్ర తపసా పరితోషితః
ఆవిర్భూతస్స భగవా\న్‌ తాసు గోపీషు జన్మని॥		 4
గద్య. తత్ర ఖలు బృందావనే మందారపారిజాతసంతానకల్పకహరి
చందనాదితరుబృందానందిత శుకపికశారికాదిబృందవినిందిత
నందనోద్యానే సముత్ఫుల్లశారదమల్లికాదిమకరందపరిమళ
లాలసతయా సంచరచ్చంచరీకఝణఝణాత్కార నూపుర
రవైః విచిత్ర పతత్రివక్త్రోద్గళిత నానావిధవినోదనినాదతాళ
మృదంగ సంగీతాది కళావిశేషైః ఆలక్షితానేకకోటి వనదేవతా
నాట్యరసోత్కటే కళింద నందినీ పుళింద సముల్లసిత లవంగ లతాది
వివిధలతాభవనే క్వాపి క్వాపి శారదసాంద్ర చంద్రికా సంగ
విలసిత మణి వాలుకా మౌక్తిక సితసికతా సుధా రమణీయ
వేదికాజాలే దివ్యవిమాన సమారూఢ సురకిన్నరాది వరవనితా
గణేషు పశ్యత్సు వర్షత్సు చ ముహుర్ముహుః పారిజాతాది
దివ్య సుగంధి కుసుమాని భక్తసంకల్పసిద్ధి మాతన్వానో గోప
రమణీయ నయనోత్పలారాధిత మదనగోపాలమూర్తి ర్వాసుదేవో
గోపీభిస్సహ రాసక్రీడా మహోత్సవారంభ సంభ్రమచేతాః
గోపీభిః సార్థ మాత్మతత్త్వ ముపదిశ న్నిదమాహ।		 5
శ్లో. బ్రహ్మానుభూతిరసికాం శౌరేర్వా గ్లక్షణాం సుధాం
గోప్యః పిబంత్యో మోదంతే కృష్ణబ్రహ్మణి తాః స్థితాః॥		 6
శ్లో. నృత్యంత్యస్తేన తద్గీతం గాయంత్యో రాసమండలే
తేనోపదిష్ట మద్వైత మనుకుర్వంతి మానతః॥		 7
కీర్తన
ముఖారి - ఆది
చరణ (1):అద్వయ మఖండిత మశేషజగదాదిం
 యత్ర చ జగత్త్రితయ మాస్థిత మనంతే
 యత్ర విలయం పున రుపైతి మృది కుంభో
 యద్వ దవధారయత సత్య మితి మా మోమ్‌॥
చరణ (2):యచ్చ నిజశక్తియుత మైక్షత పురస్తాత్‌
 యత్పున రభూ ద్వికృత మైక్షత సుతేజః
 యచ్చ క మభూ త్పున రుదైక్షత యదన్నం
 జాత మవధారయత సత్య మితి మా మోమ్‌॥
చరణ (3):యత్పున రభూ త్త్రివిధపూరుష శరీరం
 యత్త దనువిశ్వ మఖిలం త్రివృత మాసీత్‌
 జీవకలయా సకల సాక్ష్యవికృతం సత్‌
 తత్త్వ మవధారయత సత్య మితి మా మోమ్‌॥
చరణ (4):అన్నసలిలే అభవతా మసితపీతే
 ప్రాణమానసపరిణతే పరమసూక్ష్మే
 వా గభవ దప్యసిత మల్పపరిణామి
 జ్యోతి రవధారయత సత్య మితి మా మోమ్‌॥
చరణ (5):షోడశకలః పురుష ఏష పరిశిష్టః
 తాసు విలయం పరిగతాసు న చ వేద
 తాసు తు సమస్త మనుపశ్యతి తదిత్థం
 తత్త్వ మవధారయత సత్య మితి మా మోమ్‌॥
చరణ (6):యేన పురుష స్సమరసత్వ ముపలభ్య
 స్వాపసమయే స్వపతి నామ క ఇతి స్యాత్‌
 యత్ర విలయం సమనుయాతి మన ఆది
 తత్త్వ మవధారయత సత్య మితి మా మోమ్‌॥
చరణ (7):యత్రమధుపా హృతమధూపమిత మేతత్‌
 చిత్రరస మేకరసతాం సమధిగమ్య
 నైవ రసభేద మిహ వేద జగదాది
 తత్త్వ మవధారయత సత్య మితి మా మోమ్‌॥
చరణ (8):యత్ర జలధౌ సమరసత్వ మనుయాతాః
 త త్పృథ గశేషసరితో న విదు రేవం
 బ్రహ్మణి జనా అనుదినం సమనుయాతాః
 తత్త్వ మవధారయత సత్య మితి మా మోమ్‌॥
చరణ (9):యస్య కలయాయ మఖిలస్య స హి భోక్తా
 త త్పరిహృతో మృత ఇతి ప్రతివదంతి
 యచ్చ భవమృత్యురహిత సకలసాక్షీ
 తత్త్వ మవధారయత సత్య మితి మా మోమ్‌॥
చరణ (10):యత్ర చ విజృంభిత మిదం స్వగతశక్త్యా
 స్యా త్పృథ గవస్థిత మశేషజడజాతం
 యచ్చ వటబీజసదృశం పరమసూక్ష్మం
 తత్త్వ మవధారయత సత్య మితి మా మోమ్‌॥
చరణ (11):సింధుజనితం సలిలమిశ్రిత మివాత్మా
 సర్వగత ఏకరసతా మనుగతో యః
 వేదశిరసాం పరిచయేన సువివిక్తః
 తత్త్వ మవధారయత సత్య మితి మా మోమ్‌॥
చరణ (12):బద్ధనయనో వనభువి ప్రతివిముక్తః
 ప్రశ్న ముపలభ్య నగరం పున రవాప
 యగ్గురుమతం పున రవాప నిజబుద్ధ్యా
 తత్త్వ మవధారయత సత్య మితి మా మోమ్‌॥
చరణ (13):యత్ర లయ మేతి మన ఆది పరమాత్మ
 న్యన్య దనుపశ్యతి న బంధుజన ఏషః
 సర్వవిలయేఽప్యవిలయం య దవశిష్టం
 తత్త్వ మవధారయత సత్య మితి మా మోమ్‌॥
చరణ (14):అక్రియతయా సకలవిక్రియదృశిత్వా
 న్నైవ హననాదివిషయో య దవశిష్టం
 తప్తపరశు స్పృగివ సత్యపరిగుప్తం
 తత్త్వ మవధారయత సత్య మితి మా మోమ్‌॥
చరణ (15):కిన్ను కథనీయ మబలా య దనుభూతం
 సర్వ మనుభూతి మపహాయ న తు తత్త్వం
 నిత్య మనుభూతి సుఖవిగ్రహ మచింత్యం
 తత్త్వ మవధారయత సత్య మితి మా మోమ్‌॥
చరణ (16):స త్స దితి సర్వవిషయే ష్వనుగతం యద్‌
 భాసకతయా ప్రియతయా చ పరిశిష్టం
 మానమితి మేయమితి హీనమతిరిక్తం
 విద్వ దనుభూత మవధారయత సత్యమ్‌॥
చరణ (17):నిశ్చిత మశేషనిగమాంత వచనై ర్యత్‌
 తత్త్వమయ మిత్యఖిలసార మనుభూతేః
 తర్కశతకై రపి దృగేకరస మాద్యం
 ధీరమతిగమ్య మవధారయత సత్యమ్‌॥
చరణ (18):పర్యవసితం నిగమవాక్కృతక మీళే
 లక్షకతయాస్య విషయే పరిసమాప్తేః
 సర్వవిషయస్య చ తదాత్మకతయా తం
 శిష్ట మవధారయత సత్య మితి మో మామ్‌॥
చరణ (19):శ్రీమురరిపో ర్వదనపద్మమకరందం
 బ్రహ్మసుఖసారవచనం బహు పిబంతః
 గోకులవధూమకరాస్తు పరితృప్తాః
 రాసభువి మండలకృతో బహు రమంతే॥
చరణ (20):సామనిగమాంతవచనార్థ ముపలభ్య
 స్వానుభవమేక మఖిలైకరసభూతం
 ఏతదమృతం భవభయాపహరమాద్యం
 నారాయణానందతీర్థపరిగీతమ్‌॥
 07.01
శ్లో. సంసారరోగసంతప్తాః కృష్ణబ్రహ్మరసాయనం
గోప్యః పిబంత్య స్తన్ముక్తా రమంతే హ్యభయం గతాః॥		 8
శ్లో. ఆత్మారామాః పరానందనిత్యతృప్తాః పునఃపునః
ఆత్మానుభూతిం గాయంత్యః కృష్ణైకరసతాం గతాః॥		 9
శ్లో. రమంతే పరమానందే కృష్ణబ్రహ్మణి తా భృశం
త్యక్తదేహాద్యహంమానా నిర్విశేషసుఖే స్థితాః॥		 10
కీర్తన
భైరవి(ఘంట) - ఆట
పల్లవి:పర మిహ పశ్యత పూరుషం స్వీకృతమాయికమానుషమ్‌॥
చరణ (1):నిజపరభేదరహితదృశ మక్షర మీక్షణ కృతభువనం విభుం
 ఉపనిషదేకసమధిగత మద్వయబోధసుఖైకరసం ప్రభుమ్‌॥
చరణ (2):ఇదమిదమిత్యఖిలేషు సమనుగత సత్యచిదద్వయ విగ్రహం
 శ్రుతిశిరసి ప్రవివిక్త మసక్త మభక్తజనై రతిదుర్గ్రహమ్‌॥
చరణ (3):గగనమరున్ముఖభూతసముదిత సమస్తజగత్ప్రతిభాసకం
 తదను తదన్నరసమయ మశేష విశేష మఖండసుఖాత్మకమ్‌॥
చరణ (4):అధిగతమన్నమయాదిషు యోగిభిరాంతరమాంతర మవ్యయం
 హరి మఖిలైకరసం జననాది వికారవిహీన మనామయమ్‌॥
చరణ (5):విదురిహయం నిగమాంత వచోభి రపోహ్యపరాంచ మఖండితం
 అఘటితసంఘటనా ఘటితాకృతి మద్భుతకుండలమండితమ్‌॥
చరణ (6):స్వజనదయాధృత దేహమదేహతయా విహరంతమిహ భూతలే
 వనభువిరాససమయ రసపండితం గోపవధూకృతమండలే॥
చరణ (7):అతను మశేషతనుం జగతా మభయం భయకారణతారణం
 నిజకలయా పరిబృంహితసర్వ జనాత్మతయోఽఘనివారణమ్‌॥
చరణ (8):సకృదవలోకనిరాకృతగోప వధూజనతాప మరిందమం
 నవజలదాభతనుం తటిదాభం పటం నతవేషధరం సమమ్‌॥
చరణ (9):హరిచరణస్మరణైకపరాయణ జన సుఖదం పరదైవతం
 మునినారాయణతీర్థసువిరచితగీత మిదం నిగమాన్వితమ్‌॥
 07.02
శ్లో. జగదుదయలయాదే స్సాదరం సాధకై ర్య
చ్ఛ్రుతిగురుదృఢభక్త్యా లబ్ధ మద్వైతతత్వం
శ్రుతిశిరసి వివిక్తం పంచకోశాంతరస్థం
నరభువి విహరంతం తంతు పశ్యంతి గోప్యః॥		 11
శ్లో. ఏవం కృష్ణాత్మతత్త్వజ్ఞాః కృష్ణబ్రహ్మాత్మనా స్థితాః
సర్వోపనిషదాం సారం గాయంత్యః కృష్ణ మాసతే॥		 12
శ్లో. హృదయనిహతం కాంతం కాచి త్కళిందసుతాతటే
ప్రియతమ మ థాలింగ త్యద్ధా నిరంకుశతృప్తితః
నిజపరభిదాతీతం ధైర్యా చ్ఛ్రుతే శ్శిరసాం బలాత్‌
ముహు రపి భృశం గాయ త్యేనం చిరం బహు మోదతే॥		 13
కీర్తన
కాంభోజి(పున్నాగవరాళి) - ఆది
పల్లవి:కలయే దేవ మిహ సుఖకందం కలయే దేవమ్‌॥
అనుపల్లవి:నిగమనిగూఢ మఖిలదృశ మేకరసం ప్రజానందముకుందమ్‌॥
చరణ (1):య దశనయాదివికారవిహీన మశేష మజరదురంతం
 ఇహ మునయోమృగయంతి శమాదిభిరాంతరమేవ మనంతమ్‌॥
చరణ (2):ఇహపరభోగ మమరపదవీ మపి యదధిగమేవ భజంతే
 విషమివ ధీరధియోఽమరమృగ్య పరైకసుఖే విహరంతే॥
చరణ (3):నిఖిలతపశ్శ్రుతయోఽనుసరంతి య మవధితయా పరదేవం
 అభిలషితం మునిభి స్సుతపోభి రశేషభవాంబుధినావమ్‌॥
చరణ (4):సకలసుధర్మవిధర్మకృతాకృత భూతభవిష్యదతీతం
 నిజపరిబృంహిత జగదనుకూల తయా సతతం సువిభాతమ్‌॥
చరణ (5):ప్రణవతురీయసులక్షిత మక్షర మాత్మతయా య దనన్యం
 యదయమనుస్మరతిస్వయమవ్యయ మాశు స విందతి ధన్యమ్‌॥
చరణ (6):యదధిగమాదిహజన్మమృతీ హననాదిభయాని తరంతి
 పునరిహమోహవిజృంభిత మేత దతో మునయో న భజంతి॥
చరణ (7):విరతిశమాదివిహీనదురాప మబోధసుబోధసమానం
 యదవగతి ప్రతిషిద్ధ మబోధ విజృంభిత మాహురిహైనమ్‌॥
చరణ (8):విభు మశరీర మశేషశరీర గుహాసు నివిష్టచిదంశం
 వ్రజయువతీజనవల్లభ మాత్మతయా పరిశిష్టమధీశమ్‌॥
చరణ (9):ఫణిత మనంతపరాయణశివ నారాయణతీర్థే నేదం
 నిగమశిరోరసభావనయా గతమత్సరహృదయవినోదమ్‌॥
 07.03
శ్లో. నిర్విశేష చిదానంద మావిర్భూతం నిజేచ్ఛయా
కృష్ణభావేన బుద్ధ్యాది తత్త్వభూషం జగుశ్చ తాః॥		 14
శ్లో. బుద్ధ్యాదితత్త్వపరిచిహ్నితగోపవేషం
సిద్ధానుభావిత మశేషజగన్నిదానం
నాసాగ్రలగ్ననవమౌక్తిక చంద్రబింబం
బింబాధరం భవభయప్రశమం నమామి॥		 15


గానం: శ్రీ ఆకొండి శ్రీనివాస రాజారావు, కాకినాడ.

కీర్తన
కేదారగౌళ(నీలాంబరి) - ఆట
పల్లవి:మాధవ మా మవ దేవ యాదవకృష్ణ యదుకులకృష్ణ॥
అనుపల్లవి:సాధుజనాధార సర్వభావ మాధవ మా మవ దేవ॥
చరణ (1):అంబుజలోచన కంబుశుభగ్రీవ బింబాధర చంద్రబింబానన
 చాంపేయ నాసాగ్ర లగ్న సుమౌక్తిక శారద చంద్ర జనిత మదన॥
చరణ (2):కపటమానుషదేహకల్పితజగదండ కోటిమోహితభారతీరమణ
 అపగతమోహతదుద్భవనిజజన కరుణయా ధృతస్నేహసులక్షణ॥
చరణ (3):తరళకుండల రవిమండల వికసిత నిజ జనమాన పంకేరుహ
 కరుణాహాససుధానిధికిరణ శమితభవతాపస జనమోహ॥
చరణ (4):మురళీగానరసామృతపూరిత వ్రజయువతీమానసార్ణవ భో
 సరసగుణార్ణవతీర్ణభవార్ణవ సతతగీతకీర్తిమండల భో॥
చరణ (5):శంఖచక్రపద్మశార్ఙ్గగదాఖడ్గ వైజయంతీ కౌస్తుభాది భూష
 స్వీకృతబుద్ధ్యాది తత్త్వ సమన్విత దివ్యమంగళ గోపబాలకవేష॥
చరణ (6):ఆగమగిరి శిఖరోదిత సత్యచి దద్వయలక్షణసుఖభానో
 భోగికులోత్తమభోగశయన దుగ్ధసాగరజాలక్షణాఢ్యతనో॥
చరణ (7):ఇందిరయా సహ సుందరకృష్ణ పురందరాదివంద్య పదకమల
 నందనందన యోగివర్య ధురంధర నారాయణతీర్థమతివిహార॥
 07.04
శ్లో. సానందం నందసూనుం సకలజనిమతాంసారమారాదుపాస్యం
దాస్యోలాస్యంరసాఢ్యాః కరతలకలితైస్తాళవాద్యైస్సుగీతైః
కుర్వంత్యో నిర్విశంకాః కువలయసదృశో దివ్యతాటంకవత్యః
బృందారణ్యే భజంతే సురవరవనితా స్తం జగుస్స్యందనస్థాః॥		 16
కీర్తన
మధ్యమావతి(భైరవి) - ఆది(జంపె)
పల్లవి:గోవింద మిహ గోపికానందకందం
 సానంద మవలోక యామో ముకుందమ్‌॥
చరణ (1):గోపికాగణ నయన కుముద పూర్ణేందుం
 గోపాలకులతిలక మఖిలజనబంధుం
 శ్రీపతి మనింద్య హరిచందన సుగంధిం
 శ్రేయోవిధాయి కరుణారససింధుమ్‌॥
చరణ (2):సంగీతరసరసిక సరస సల్లాపం
 సరళ మురళీ గళిత సాధుసంతాపం
 శృంగారరసపూర శ్రీమదనగోపాలం
 శ్రితజనానంద మఖిలానందరూపమ్‌॥
చరణ (3):అంగనాముఖపద్మసంగిభంగాక్షం
 ఆలోల మకరకుండలనటనదక్షం
 మంగళాకర మఖిలలోకసంరక్షం
 మాధవ మశేష సురరిపుగణ విపక్షమ్‌॥
చరణ (4):వల్లవీమాణిక్యమణియుగళఖేలం
 మరకతమణిచ్ఛాయమదనగోపాలం
 మల్లికాజాజిచంపకాదిసుమభారం
 మహనీయలావణ్య లలితతరపూరమ్‌॥
చరణ (5):స్ఫురదధరకలితమురళీనాదసుధయా
 సురసుందరీగణం కర్షయతి కృపయా
 గురుకరుణయారచిత మేత దతిలలితం
 నారాయణానందతీర్థసముదితమ్‌॥
 07.05
శ్లో. ధ్రువమఠముఖముఖై స్తాళభేదైరటంత్యో
వనభువి వరనార్యో రాసగోష్ఠీగరిష్ఠాః
అలఘులఘుపదాది న్యాసభేదైశ్చ నాట్యైః
సరసమభినయంత్యో నందసూనుం భజంతే॥		 17
శ్లో. ముహురపి సురనార్యో రాసలీలావిలాసం
జగురితి దివి దివ్యస్యందనానందవత్యః
అభినయమపి తాసాం వల్లవీనాం మురారే
రధికమభినయంత్యః పుష్పవృష్ట్యార్చయంత్యః॥		 18
కీర్తన
నాట - ధృవ
ధృవమండలమండిత వధూజనమండల మహోన్నతం
భవసాగరతారకగిరాం పరిభావుక సులక్షితం
ద్రుతమధ్యమ మంధరగతిం అవలోకన సుందరం
కృతపుణ్యఫలాత్మక నృహరిం పరిపశ్యత వ్రజౌకసామ్‌
 
త్రిపతాకపతాకసుకరైః కటకాముఖశిలీముఖైః
పరభావరసోత్కటపరై రపి వీక్షణసుశిక్షితైః
తనుమధ్యనియోజితకరై రపి నాట్యరసోత్కటాః
నారాయణతీర్థకృతం హరి రితి యతిజనతోషమ్‌
 
తాంతక కిణ తధిమి తకిట తఝణు తకిటత - తకధరికిట ఝణు తాహ తధణ
ధిమిధిమిను తకిట తధిమి తకిటతక - ఝణు తాకిట తకధణతా
తకధణాం తకిట ఝం తరికిట తకఝం - ణం తరికిట తక - ధణం
తకిట తఝం తకిట - ధిర్గుడుతధైయ్యత్తక - ధాకిట తకఝం
తకిట తఝం తకిట - ధిర్గుడుతధైయ్యత్తక - ధాకిట తకఝం
తరికిటతక ధళంగుతక ఝంతకిట - తకధిమి తకిట ధణధిమిధరితక -
తతకిటతక తకఝణు తధణ తద్ధిమి - తకదధిగిణధోం॥
 07.06
కీర్తన
మధ్యమావతి - మఠ్య
జగదీశం పశ్యత సురవనితా
వ్రజాంగనాభి రిహ నవనవమణిదివ్య
కుండలతరణి నిచయశశిగణసంజాత
శ్రీజితసత్యలోక విచిత్రభూతి రయమ్‌
 
లీలామయ దివ్యసుందరమదన
కోటివిలసితతను ర్వధారాశి ర్నృత్యతి భువి
నిజదాసవర్గ సుఖకరకృపాంబురాశి రేవమ్‌
 
తకధీనుత జకకిణణక ధిధకిణణక ధికితధిమిత - ఝణు తద్ధణ తద్ధిమి
తకిటతకతోం - ధరికిటధిం ధిర్గుడుతధైయ్య తదధీనుతధీ -
తకణక ఝంతరి కుంతరి - తకిట ఝంతతక ధణం తరికిట -ధాకిటతక
ఝంతరి కిటతక తాహ తధికితక - తధిమి తకిట -
తకఝణుతక - ధిమిత ధిమిత తకదధిగిణధోం॥
 07.07
కీర్తన
తోడి (ముఖారి) - రూపక
నిత్యానంద మిహ పశ్యత నరసింహం
వ్రజవధూభి రధిలాస్యకృతం
భక్తానా మభయదం - భవబంధనవిదళనం
మునివర్యమోక్షైకఫలవేదవిదితం
ఇంగితలింగిదయాసుధయా పరిమితముదా
గోపీజనమనసిజానేకరూపధర మిహ
పరిపాలితనిజజనం నిరవధికకరుణారసమ్‌
 
తఝంతక ఝణుంతక - తధిమి తకిట ధణధిమితక ధరికిటఝణు -
తఝంతధీ - తకతధిమిత - కిణఝం తరిధణతా -
ఝణు తాహత - తధిమి తకిటఝణు -
ధికిత కధణ ధిమిత ధణత తధిమికిట ధాణుం
ధణంత ధణంత ఝణుంతక ఝంతరి -తద్ధళంగు తకఝణు -
తగధిమిత తకిట తకతక ఝణుత - తధిమిత కిటధిమిత -
ధణధిమి తకదధిగిణధోం॥
 07.08
కీర్తన
పంతువరాళి(వరాళి ) - జంపె
సురలోకవనితా స్సమవలోకయతదేవ
మఖిలలోకాధార మధికతరలీలం
శరణాగతత్రాణ కలితసంకల్ప మిహ
వనభువి మహోల్లాస రాసరసరసికం
వ్రజపురవధూకలిత వివిధతాళమృదంగ
సంగీతరసవిజ్ఞ మఖిలసారజ్ఞం
ఉదయవిలయాతీతరసఘన మచింత్యమ్‌
 
సదయహృదయాలోక కలితకైవల్యం
అధికతరసాహసోత్సాహ గాంభీర్యం
విధిముఖవిమృగ్యపద విమలవిజ్ఞానం
కనకకటిసూత్ర వలయాంగదపటీరం
కలితకౌస్తుభశోభిత కమనీయకంఠం
శ్రీవత్సలక్షణ మశేషసురరక్షం
శ్రేయసా మాస్పద మశేషభువనానామ్‌
 
తందిరి నాదిరి నాద్రింద్రిం నుతక - తధిమి తకిట తకఝణం -
తగణం తద్ధిక్కిటతక నంధిక్కిటతక - ధింధిం తత్తాది తత్తాది -
గిణగణాంకిణ - తోదిగిదిగీ - ధా దుగు దుగు జంజం తజం -
తద్ధిమిత ఝంతరి తధణాం - ధాణు ధణ ఝణు రాహంత -
తధిమి తకిట ఝంతకఝం - జణు తాహత జంతరి తధిమి తకిటతక -
ధణధిమిఝణు తకదధిగిణధోం॥
 07.09
కీర్తన
శ్రీ - త్రిపుట
గోపాల మాకలయ సఖి హే గోపికాయుతమండలి
చందభానుసమాగ్రమండల నియత దేవనిత్యబోధ
మఖిలసారమాదిదేవ మతులలీల మమరగీత
మప్రమేయపరాక్రమనిత్యశుద్ధసుఖైకవిగ్రహ మచ్యుతమ్‌
 
తత్తగ్ధీధినుత - ఝంతరి తధిమి తకిట - తధిమి తఝం - తఝం -
ధణాం ఝణుం ధణాం ధిమిత ధీదణ తకతధిమి తకిట ఝణు తతకిట -
ధికితక ఝణు - ధణధిమి - తధిమి తతకధణత - ఝణు
తాహత ధిమిత ఝణుత - తకధరికిట ఝణుత తద్ధిమి తకిట -
ధికితక ఝణుతక - తకదధిగిణధోం॥
 07.10
కీర్తన
ఆనందభైరవి - విళంబ
కలయత సురవనితా మదనగోపాల
మనుపమలావణ్య సరిదేకనాథం
వనభువిరవితనయా తటినీతట
హరిచందన లవంగలతాది విలసితం
నిరుపమరాగ రసోల్లసిత వల్లవ
యువతీజన మానసకుముద పూర్ణేందుం
మృగమదతిలక కలితఫాల సుందర
 
శ్రమజలకణ ముక్తాఫలజాలరసం
చరణకమలగత మణిమయనూపుర
మధుకర మదనిచయ శిక్షాగురుం
మంద్రమధ్యమ లఘుతర గతిభేద
సుందరాస్యనందిత యువతీబృందం
హరిచందనతులసీ కమలకేతకీ కుంద
కుముదపారిజాతాది కుసుమసుగంధిమ్‌
 
తాం - తక్కిణకిణ తకజం - తకజంత కుంతరి -
తద్ధణం తద్ధణాం తద్ధినుత - ధణతద్ధిమి తకజంత -
తకజంత తద్ధణాం తధిమితక - తాహు జంతరి ధణాం జణుతా -
తకిటజం తకజం తధిమితక - ఝణుత ధణధిమి -
తజం తకిట తకజం కిణజం - తకధి త్తకజం - జణుతాహత -
ధణధినుత - తజణం తతధణత - తద్ధిమిత కిటతక
ఝణుతక రేతక దధిగిణధోం॥
 07.11
కీర్తన
సౌరాష్ట్ర - ఏక
కలయత వనభువి కమలేక్షణ మిహ
కలితలలిత మురళీకలనినదం
కల్పితబహువిధకామవిశేషం
కరుణారసఘన మనుపమవేషమ్‌
 
శ్రీగోపాలకరాసక్రీడా
సిద్ధమహోత్సవవర్ణన మధునా
శివనారాయణతీర్థసుఘటితం
స్థూలాదిక మితి హరిగురుకృపయా
 
తకజం - తక ధీధిను తజం - తద్ధిమి తక్కిట -
జణు ధణతాం - తకకిణ జంతరి - ధణ ధిమిత ధిమిత -
తకధరికిట జణు తద్ధిమి తద్ధిన్నాం తకజణుత తకిట తధిమిత -
ధికిత జణు తాహత ధిమిత కిట జంతరి - తకజణు తక తకదధిగిణధోం॥
 07.12
శ్లో. అంగప్రత్యంగ గౌణస్ఫుట సమవిషమ వ్యంజకవ్యక్తిసిద్ధైః
శృంగారాద్యై రనింద్యై రధికమభినయం వ్యంజయంత్యో యువత్యః
రాసక్రీడావిలాసై ర్వనభువి నితరాం మాధవం తోషయంత్యః
తుష్టాః స్వైరం రమంతే చిర మిహ గురుణా శ్రీధరేణాప్తకామాః॥		 19
ఇతి శ్రీనారాయణతీర్థవిరచితాయాం శ్రీకృష్ణలీలాతరంగిణ్యాం
శ్రీకృష్ణరాసక్రీడావర్ణనంనామ సప్తమతరంగః॥
AndhraBharati AMdhra bhArati - nArAyaNa tIrtha - Krishna lila tarangini - Krishna leela tarangini - Krishnalilatarangini - Krishna lila taramgini - nArAyaNa teertha Narayanateertha Narayana teerdha Narayanateerdha andhra telugu tenugu ( telugu andhra )