ఆంధ్రభారతి - తూము నరసింహదాసు కీర్తనలు

యమునాకల్యాణి (సింధుభైరవి) - ఏక

పల్లవి:

కావేటిరంగా నను కానవేరా

అనుపల్లవి:

కావేటిరంగ నను గావుమనుచు వేడ
రావేమి సేతురా రాకుమారా

చరణము(లు):

కోమలాంగులెల్ల చామరలిడుచుండ
నా మొరాలింపవో కామజనకా

సేవకుఁడను నన్నుఁ జేకొనుమంటి నిక
నీవే గతియంటి - నీరజాక్ష

పాతకుఁడ నటంచుఁ బట్టు వీడెదవు నీ
చేత గాకున్ననేమి - సేతునో హరీ

జాల మేల నే నీపాలిటివాఁడ భక్త
పాలనలోల కృప నేలుకోర

కోరికతోడ తూము నారసింహదాసుని
జేరి రక్షింపవే మురారిశౌరి