ఆంధ్రభారతి - తూము నరసింహదాసు కీర్తనలు - రామ యిందాక యెందు బోయినావురా

గానం: శ్రీ ఆకొండి శ్రీనివాస రాజారావు, కాకినాడ.

యమునాకల్యాణి - ఆది

పల్లవి:

రామ యిందాక యెందు బోయినావురా

అనుపల్లవి:

ప్రేమమీర నాముందర
యేమరుండ వైతివా కావు కావు

చరణము(లు):

మొలక నవ్వులమోమునఁ దిలకము మెఱయగ
గులుకుచు ముద్దుల పలుకులు - నేను వినను

కుంకుమరసము దుప్పటి - కురుచవిల్లు చేతఁ బట్టి
శంఖచక్ర ధారుడవై - పొంకముగా సొగసుమీరిన

బంగారు చెరగుల చీరలు - రంగుమీరగ దాలిచి యు
ప్పొంగుచు భద్రాచలంబున - సంగతిగ మాసీతను గూడుక

చందురు గేరుమోమున శ్రమ - బిందు కణములూరగా
మందహాసము మెఱయఁగా - ముని బృందము సన్నుతిసేయగా

శ్రీకరమైన మీపదములు - నరసింహదాసాహ్లాదములు
ప్రాకటముగ భవహరములు - శ్రీభద్రశైలాభరణములు