 |
    |
    |
 |
    |
    |
 |
| కీర్తనలు | తూము నరసింహదాసు | కోదండపాణి యదుగో! కోదండపాణి యదుగో! |
| భైరవి - ఆది |
| పల్లవి: |
| కోదండపాణి యదుగో! కోదండపాణి యదుగో! |
| అనుపల్లవి: |
| ఆళి సముదయముల వదలించెడు బల్ తళుకు ముంగురుల బెళుకు గలుగువా డదుగో |
| చరణము(లు): |
| కోటిరవిప్రభ దీటుగొనిన బహు తేటగలుగు కిరీటము గలవా డదుగో |
| తీరుగ కస్తూరితిలకము మెఱయగ చాల భ్రూయుగముపై సైగలు గలవా డదుగో |
| చందురురుచి గడు మందముజేసెడు పొందు గలుగుమో మందము గలవా డదుగో |
| సారసములుగడు సరకుగొనని కరుణా రసములు గల కన్నులు గలవా డదుగో |
| వెన్నెల నీనెడు సన్నపునగవుల చెన్నలరెడు నాపన్నరక్షకు డదుగో |
| ఎట్లు చూచినను యినకులసోముని యట్లుదోచు చౌకట్లు మెఱయువా డదుగో |
| కంబుకంఠమున ఘనరుచి గల ర త్నంబు మెఱయ శ్రీరఘుకులతిలకుం డదుగో |
| మేలిమివక్షమున మించుహారములు చాలముత్తియపు సరములు గలవా డదుగో |
| కరయుగముల వరశర చాపంబులు తిరముగ దాల్చిన గురువీరుడువా డదుగో |
| కదలక కుదురుగ జగములు దరమున పదిలముగా నిడి పాలించెడు వా డదుగో |
| నాలుగుమొగములబాలుని గన్న వి శాలనాభి గుహజాలము గలవా డదుగో |
| జాంబూనదమయచేలము మెఱయగ అంబుజ మనగ ముఖంబు గలుగువా డదుగో |
| ధరణి సహితుడై దాసుల బ్రోచెడు దొర యీతండని సురలు పొగడువా డదుగో |
| వాసిగ భద్రాచలేశు డగుచు భువి భాసిలు నృసింహదాసు నేలువా డదుగో |