ఆంధ్రభారతి - పల్లెపదాలు - గంగమ్మొదినా - కృష్ణశ్రీ - శ్రీపాద గోపాలకృష్ణ మూర్తి -పల్లెపదములు

157. గంగమ్మొదినా

ఇది యెవతెయో కప్ప తలకాయ దీనిది. వళ్ళే మనిషిది. మధువునాని ఎగిరిపోయిన తుమ్మెద కోసము ఎదురు చూస్తున్నది. వాడెవడో బర్సాత్‌ నాయకుడు. నిరతంబు మల్లిక కడనే యుండి ముదము గూర్పగ నాతని కొక్క పూవేనా?

సెంగావి సీరగట్టి రంగూలా రవికె తొడిగి
కొంగూనూ జార యిడిశానే ఓ గంగమ్మొదినా
నే ముందరెల్లి వయ్యారి నిలచితినే ఓ గంగమ్మొదినా
బంగమయ్యె నా వాలుచూపులే ఓ గంగమ్మొదినా
సెవలా తమ్మంట్ల యెరుపూ సేతి మురుగూల పసుపూ
సేదేనే మీసాల నలుపూ ఓ గంగమ్మొదినా
నా బారమంతా నీకె దక్కేనే ఓ గంగమ్మొదినా
కోరపాగా కోరసూసిందే ఓ గంగమ్మొదినా
ఉంగ్రాల జుట్టు దువ్వి సెంగల్వ పాగా దిద్దీ
అంగాలో ఆగిపోయాడే ఓ గంగమ్మొదినా
నా సంగతేదో సూసిపోయేడే ఓ గంగమ్మొదినా
పొంగు పొంగు అణిగి పోయిందే ఓ గంగమ్మొదినా
పొద్దుకూకే పూల సాయా అద్దరేతిరిది ఆ అరుపు
నిద్దరేదే నీలి కళ్ళకు ఓ గంగమ్మొదినా
సద్దులేని జాములొకటైనే ఓ గంగమ్మొదినా
వారాలు తిరిగిపోయె దూరాలు దూరమాయె
ఏరోజా రోజు గడవాదే ఓ గంగమ్మొదినా
మా రాజు రాకలేనాడో ఓ గంగమ్మొదినా
నా రాతలేమి రాశాడో ఓ గంగమ్మొదినా